Wednesday, August 22, 2007

ابلة دندش

يالله يا كريم قربت الإجازة تخلص و بدا العد التنازلي للعودة للمدارس

وفي حالتي هذي راح نرجع للواع و الويع و الصراخ



اكيد بتوقعون انه هل البجي و النواح من الاطفال



لا يا قرائي الأعزاااء



تذكرون يوم قلت لكم ودي اتعلم كارتيه و الدفاع عن النفس استعدادا للحرب

الله يسلمكم لما تكونون في روضة يكون هناك صراع لا مو صراع في الوادي هذا صراع على الفصول و صراع على تقدير امتياز و صراع بين المدرسات



عرفتوا شنو ناطرني .. ناظرتنا الله يهداها كان من المفروض انها تسوي اجتماع بهل الخصوص خاصة بعد ما قالت لنا في اجتماع سابق انها تبي تسوي انقلاب!! و تفرق المدرسات حرصا على الألفة و المودة بين المدرسات



اسمحولي شوي بعبر عن ما نفسي









ياااااااااااااااااااااااااااااااااااااااااااااااااااااااااااااااااااااااا لهوووووووووووووووووووووووووووووووووووووووووووي

يااااا شماااااااته ابلة زازا فياااااااااااااااااااااااااااااااااااااااااااااااااااااااااااااااااااااااااااااااااااااااا

هوووووانااااااا ناااااااقصة مش كاااااااااااااااااااااااااااااااافي البت الي كانت معااااااااااايااااااااااااااااااااااااا في الفصل ياااااااااااااااااااااادي النييييلة





اوكي بااك



عدنا لكم من جديد



انا ماعندي مانع خصوصا اني توني جديدة عل المدرسة و علاقتي الحمد الله زينه لكن المدرسة الي معاي في الصف يعني البعد عنها رااااااااااااااااحة و هنااااااااااااااااااا



الحين وين القمندة الناظرة الله يهداها و يصلحها ترددت في اللحظات الاخيرة و كنسلت الإجتماع الي بداية العام الدراسي الجديد " الي راح يشرف من غير شر بعد اسبوعين "



القصة وين الله يسلمكم الي معاي في الصف انا كارهتها و اخر فترة ما اكلمها بس سلام و عليكم السلام لانه طول السنة و انا مستحملتها وتسوي دقه كل وحدة اكبر من الثانية و تشيش البعض علي لكن الحمد الله ربي ما يخلي عبيده الحمد الله كل مرة اقدر ارد عليها و بين للمدرسات جذبها و حركاتها



يعني ابسط شي قرائي الأعزاء نهاية العام الدراسي سويت غلة بسيطة لعيالي مني مو الزامي علينا كمدرسات و المفروض نجهز الشهادة و هدية و اذا في اغراض ما اخذها نحطه لهم بكيس

شفتو كل هذا ما سوت منه ولا شي اقول لها بيني و بينها ترى بتشري الاغراض
بحط 5 دنانير و انتي ؟ اييي انا معاج اليوم اعطيج
باجر اعطيج
عقبه اعطيج
قلت يمكن ماعندها انطر لين تنزل المعاشات ما عندها حجة
نزلت المعااشات و عمك اصمخ
قلت خلاص بطر منها يعني رحت و شريت و عدلت الصف و شلت اغراضي و اتصلت على الأهالي عشان يستلمون اغراض عيالهم ... تبونها حست ابدااا بتااتا البتة

اخر شي تهقون شسوت

وييييي فلالالالانة يااا كرهج رحتي و شريتي و ما علمتيني
انا : نعممم جم مرة قلت لج
ايي عادددد خلالاص مشكورة هاااج
انا: شنو هذا
ويي عاد فشلة شريتي و ما ساهمت معاج
انا: بقلبي " مو اول مرة"
اطالع ولا دينارين

اطالعها و ارد لها الفلوس لا فلانة مشكورةو ما قصرتي
هوووو فلالالالانة عيب لا ترديني خلاص
انا : لا ما اردج بس خلاص ما تسوى السالفة و كلها جم يوم و بنعطل ما تسوى
وييييه يا كرهج على هل الطبع

صج انا شارية الاغراض من بو 100 بس ترى مو كل شي من بو 100 ب 100
و صفنا فيه 19
يالله مو اول مرة
الحمد الله عدت السنة على خير
صج ارتحت نفسيا بمكاني اليديد عكس الروضة الي كنت فيها لكن ما ضيق خلقي الي الي معاي بالصف و الي اهي المفروض انها مربية الصف يعني مسؤولة عن كل هذا

عرفتوا الحين ليش مالي خلق الدوام لانها ملسونة ونحيسة و انا حيل ابتعدت عنها و ما تدرى اني مبلغة الادارة اني ما ابي اكون معاها بنفس الصف و الحمد الله انه الإدارة متفهمة هل الشي و مقدرة مجهودي


قلبت راسكم بسوالفي؟؟؟

عيل خلق اقول لكم شغلة بعد

عيل تايه يا ولاد الحلالالال

مفتاحي العزيز ما ادري وين راح مختفى صار له شهر ="(
اهو ومفتاح البيت و الميدالة هذي اهممم شي فيها صورة الغالي مادري وين راحت
اكتئبت و ضاق خلقي عفست البيت و دورت و سويت حملة تفتيش مباغتة لدور الخدم هم مفيش فاااايدة

طلعت الأسبير و غيرنا مفاتيح البيت و غيرت الميدالة بس .. لم يظهر المدعو عليه بعد
ابييهاااااا اين انتي يا ميداليتي العزيزة

وو بس
اهداء
http://http://song.6arab.com/angham_Atmannalo-El-Kheer.ram

Thursday, August 02, 2007

2-8-1990

كان يوم عادي مثل اي يوم في عطلة الصيف
كان عمري 8 سنين
كان يوم خميس
بدا مثل اي يوم عادي بس الجو في البيت ماكان عادي
اختي تبجي و بحرقة
ابوي يدخن Align Center
باسل يلهيني بالجريدة و يطلع و ليته .. استغفر الله العظيم
هذي كانت اخر مرة اشوف فيها باسل حسبي الله و نعم الوكيل
الله يرحمك و يرحم شهدائنا الأبرار

كانت أيام حيل صعبة .. كنا نتعاون في كل شي حتى في شغل البيت اتذكر لما كنا نغسل حوش البيت كنا كلنا مع بعض حتى ابوي و نونس بعض
اتذكر لما يتفق ابوي الله يرحمه مع الجيران و كل يومين او ثلاثة يتجمعون و يركب الجمس و كل واحد يشتري الأغراض لبيته
اتذكر التنكر الحمر كان عندنا تنكر ابوي الله يرحمه يروح ويعبيه ماي و يستفيدون منه كل الفريج
اتذكر الجنود و اهم في جمعيتنا
اتذكر الشباب الي اشتغلو في الجمعية
اتذكر لما ترسنا السطح دجاج و ديك رومي
اتذكر فترة التفتيش شلون كلنا ندور البيت اكثر من مرة نشيك اذا في علم ولا كتاب و لا منشور
و نغير محطة الراديو و التلفزيون للعراق
اتذكر الحديقة الي دفنا فيها السلاح
اتذكر و اتذكر
سبع اشهر كانهم سبعمية سنة
بس يا ترى عيالنا بيتذكرون ؟