ذكريات

بعيدا عن كل الي قاعد يصير الحين في لبنان .. اسرد لكم ذكرياتي

انا في الروضة ويا صحابي ساعة لعوبي ساعة كتابي

في هل المرحلة الي من المفروض انها تستمر سنتين لكن و بي كل فخر دخلت ابواب المجد من اوسعها دخلت الروضة و على طول رحت سنة ثانية
( اخر العنقود و تو الناس اني اروح الروضة فلما كبرت دخلت الروضة و كنت اكبر من اولى و اصغر من ثانية فالحل الوسط اني ادخل ثانية و دخلت اولى باتدائي اصغر منهم بسنة لووول )

ما اذكر شي غير الصور الي للحين محتفظة فيهم و يا محاسن الصدف استخدمهم الحين في شغلي !
اذكر وحده حاطة دوبها و دوبي كل يوم اتطقني ="(
اذكر سكرت باب الحمام و انتو بكرامة على ابلتنا ( اياام ما كان حمام الابلة داخل الصف)
اذكر التوستة الباردة و البيضة المسلوقة الي هم باردة و جبن السلايس و حليب كاكاو

و كبرناااا يا بيٌ
و دخلت الابتدائي ... امم بما اني و اعترف اني دعلة .. ها عفوااااا دلوعة بحكم اني اخر العنقود فعادي يعني ابجي على اي شي و ابوي الله يرحمه ما قصر معاي في ميزان حسناته سوى كل شي عشان تكون اقامتي بهل المدرسة مريحة
اتذكر طابور المقصف ( للحين في مقصف؟) و تخلص الفرصة و و انا ما شريب بفك الذرة المنفوخ ولا فطيرة الجبن ولا السانكيست
كرهت شي اسمه رياضيات
دندش سمعي جدول الضرب
3*5 = 15؟؟احــم احمم امم

شسوي اكره شي اسمه رياضيات

و يه الغزو و كان عمري 8 سنين
و لما زالت الغمة كنت متشوقة للمدرسة و دقيت على شلتنا
بنات شرايكم باجر بروح مع ابوي عشان انشوف المدرسة و راح نصبغها تيون نصبغ مدرستنا و نعدل مدرستنا مثل مدرسة اخوي اهو و ربعه قاعدين ينظفون مدرستهم
كلمتني ام وحده من البنات و ماقصرت عطتني المقسوم

رحنا المتوسطة و قررنا كلنا نسجل اسمنا بثانوية وحدة
و رحت مصر كالعادة للاجازة
و رديت ليلة التسجيل الخاص بالمستجدات
دخلت و عيوني تطالع في كل مكان ( هو ... وينهم ؟!)
رحت للوحة اقرا اسمي و رقمي
95/64
اقرا اساميهم بس وينهم ؟؟!
اسمع اسمي التفت ولا لقيت وحدة منهم
فلانة اشوه اني شفتج وين البنات
كككك وينج ما دريتي راحو ثانوية ....
(...)
؟؟!!!!
ليش!ين ما ادري
و علاقتي فيهم انقطعت
مرحلة الثانوية كانت مأساوية بكل معنى الكلمة ما حبيت دفعتي ما حبيت الجو ما حبيت فيها و لا شي
كنت عايشة سني لكن اكتشفت هل الشي غير مقبول لازم ازيد على عمري 10 سنين و لا انتي شلون عايشة
و لازاام و لا بد وحدة منهم عايشة قصة وهمية عشان تصير cooool
فطنشتهم رغم تعليقاتهم السخيفة رغم انهم يردون لي دايما ( شفتو السخافة)
في هل امرحلة قويت لغتي الانجليزية و في هل المرحلة دخلت لوحة لشرف و في هل المرحلة كنت متميزة في تخصصي و في هل المرحلة فقدت ابوي قبل تخرجي بكورس
شلون تخرجت ما ادري كنت ارفض اي درجة احصلها لاقتناعي انهم يعطوني هل الدرجة من باب شعورهم بالشفقة .. بس هم تخرجت بمعدل مرتفع
دخلت الجامعة ياللهول

عالم ثاني نفس مجتمع الثانوية بس على اكبر و بعد مختلط @@
الشي الوحيد الجيد انه اخوي كان معاي بنفس الكلية فاروح معاه على الاقل اطئمنان نفسي
اول تجربة مع الموبايل يننت اخوي كل اشوي داقه عليه زين استحملني لوول
يعني اول محاضرة الساعة 8 لين 9 وربع
وفاضية لين 12 ما اقدر ارد البيت للحين ما اسوق 17 سنة و اخوي عنده محاضرات
و الي كانو معاي بالثانوية ما نلتقي عشان توقيت المحاضرات
فاطلع من المحاضرة سيـــــــــــــده على المكتبة اقعد اسوي الهوم ورك و ادرس ولا اقعد انطر وحدة من البنات
على الكورس الثاني قررت اني احول لكلية ثانية ( مجبر اخاك لا بطل) كله من الرياضيات و الي اخترع الرياضيات
رحت كلية العلوم الاجتماعيةاول الايام امشي بالكلية اشوي و ابجي كاااااااااااارهة كل شي و ما اعرف احد
و المكان بكبره يب ضيقة الخلق ماتغير شي من الروتين غير انه صار عندي سيارة فخلص محاضرتي اروح يا الكافتيرا اوالمكتبة انطر المحاضرة الثانية ولا سيجة على المواقف ارد البيت و ارد اطلع مرة ثانية
شديت على عمري بالدراسة حطيت هدف جدامي اني اتخرج باربع سنين و ما اخلي التحويل يأثر علي
فكنا اخذ 15 وحدة او 18 وحدة اقاااااااااااااااااتل في التسجيل
في المحاضرات كان لازم اشارك و اناقش مع الدكتور/ة فكان شوي صعب على في البداية بعدين لالالالا لساني صارر اشطوله لووول
احلى فترة اخر 3 سنين ليش مو اول سنة لانه كانت كآبه
صج كرهت دكاترة و لازلت اكرهم حبيت دكاترة و لازلت احبهم
تعلمت رغم كرهي لموقع الكلية اني احب كل مكان فيها
اختي حبيبتي كنت اأذيها كل ما اطلع من محاضرة ادق عليها و او مسج
روبااا صديقتي الصدوقة معاي من الثانوية ما صدقتج وقتها يوم قلتيلي ترى بندخل نفس الكلية
و اخيرا تخرجت و بالفعل بأربع سنين و معدل جيد جدا
عشانك يوبه
بعدها بسنة و نص تقريبا اشتغلت
وو توتة توتة خلصت الحدوتة